Ёлка ў Елцы
10 снежня на Зэльвеншчыне першай заззяла зялёная прыгажуня ў нашым аграгарадку Елка. Свята так і называлася “Ёлка ў Елцы”, якое праходзіць ужо трэці год запар. І з кожным годам яно набірае размах і здзіўляе гасцей займальнымі навінкамі.
Адкрыццё мерапрыемства адбылося з парада казачных герояў у карнавальных касцюмах, а былі там Санта-Клаўс і эльфы, хітрая лісіца, плюшавы мядзведзь, элегантныя прыгажуні-елачкі, матылькі, месяц і сонейка, не абышлося без сімвала наступаючага года – тыгра і інш. Самым крэатыўным быў касцюм вучня 2 класа Улада Юрко “сонейка”. Дзяўчынкі 7-8 класаў запрашалі далучыцца да вясёлага флэшмоба. А затым пад навагоднія песні карагода Дзед Мароз і Снягурка сабралі ўсіх ля ёлкі, каб запаліць агеньчыкі зялёнай прыгажуні, тым самым і даўшы старт навагоднім святам на Зэльвеншчыне.
