Цёплая сустрэча
4 лютага ў школе адбыўся традыцыйны вечар сустрэчы выпускнікоў. У актавай зале сабралася больш за сто гледачоў: выпускнікоў школы розных гадоў Казловіцкай базавай школы, Елкаўскай сярэдняй школы, Чырванасельскай сярэдняй школы, настаўнікаў-ветэранаў і сёння працуючых у школе, і проста жыхароў аг.Елка. Святочны канцэрт пачаўся з выступлення дырэктара школы А.В.Лебедзя, які расказаў аб сучасным жыцці ўстановы адукацыі, яе дасягненнях, матэрыяльнай базе, створанай пры дапамозе і падтрымцы дзяржавы, падзяліўся планамі на будучае. У канцэрце прынялі ўдзел не толькі навучэнцы розных класаў, але і іх бацькі, і работнікі Елкаўскага Дома культуры. Цёплыя словы ўдзячнасці былі выказаны ў адрас школы і настаўнікаў Міхаілам Францавічам Макеем, выпускніком з 40-гадовым стажам, 35-гадовай выпускніцай Дабрынеўскай Таццянай Віктараўнай, прадаўцом магазіна "Тапалёк", і іншымі выпускнікамі, многія з якіх сваёй працай праслаўляюць не толькі родную школу, але і СВК"Сынкавічы" і Зэльвенскі раён. Асабліва расчуліла і абудзіла пачуццё гонару за школу і яе выпускнікоў прэзентацыя з імёнамі былых навучэнцаў, а зараз вядомых у краіне людзей, якія сваёй працай уносяць важкі ўклад у развіццё дзяржавы: генерал-маёр юстыцыі П.В.Урублеўскі, загадчык кафедры ўніверсітэта грамадзянскай абароны МНС, кандыдыт хімічных навук, палкоўнік А.В.Урублеўскі, падпалкоўнік МВД В.І.Лухтан і падпалкоўнік Ваеннай акадэміі РБ М.М.Бараноўскі, кіраўнік фермерскай гаспадаркі М.Ф.Макей, галоўны аграном СВК "Сынкавічы" А.В.Парфенчык, намеснік галоўнага бухгалтара СВК "Сынкавічы" Ж.А.Калодка, ст. лейтэнант Зэльвенскага РОЧС А.Ю.Ліпскі, медыцынская сястра Елкаўскай урачэбнай амбулаторыі С.М.Ахраменя, заатэхнік-селекцыянер СВК "Сынкавічы" М.М.Лешчык і многія-многія іншыя...Напрыканцы вечара прагучаў школьны званок, як напамін аб тым, што школа заўсёды рада вітаць усіх сваіх выпускнікоў!
